အဘကို တုန်လှုပ်သွားစေခဲ့သော ရွှေဘို

ပုံမှန်မှာ အဘခရီးစဉ်တွေက ထိပ်တန်းလျှို့ဝှက်ပါ။ တပ်ထဲက မဆိုင်သူတွေတောင် မသိရပါ။ ယခုအဘက ကိုဗစ်ကာလမှာ အနောက်မြောက်က နယ်ဘက်က ဖွတ်တွေမဲနိုင်နိုင်တယ်လို့ ထင်တဲ့ တပ်နေရာတွေမှာသွားပြီး မူ ၆ ချက်နဲ့ မဲပေးဖို့ သွားပြောပါတယ်။ ဒဲ့တော့မပြောပါ။

ရွှေဘိုဟာ ဦးအောင်ဇေယျရဲ့ အောင်မြေပါ။ တတိယမြန်မာနိုင်ငံတော်ရဲ့ မြို့တော်ဖြစ်ခဲ့ပါတယ်။ ဒီနေ့ရွှေဘိုမြင်ကွင်းကတော့ ထူးဆန်းပြီး တပ်ထဲမှာလဲ ဒီဗီဒီယိုကလစ်ကို ကြည့်ရှုသူများသွားခဲ့ပါတယ်။ပထမဆုံးငြင်းခုံကြတာက အဆိုပါကားတန်းဟာ တပ်ချုပ်ကားတန်း ဟုတ် မဟုတ်ပါ။ အဖြေက တပ်ချုပ်ကားတန်းဟုတ်ပါတယ်။ ဒီမိုအစိုးရတက်အပြီးမှာကထဲက တိုင်းမှူးတောင် စစ်ဆင်ရေးမဟုတ်ရင်ယဉ်တန်းအများကြီးမရတော့ပါ။ ပုံထဲမှာ ရွှေဘိုသူ ရွှေဘိုသားတွေက ပုရစ်နှစ်ကောင်ဝဲသံကြားချိန်မှာမ လူစုလိုက်ပုံပါ။ ယခုလို အချိန်အတိုအတွင်းမှာ အဆိုပါလူအင်အားကို စုနိုင်တာက ပထမဆုံးလေးစားရပါတယ်။ နောက် NLD အလံ၊ ပြီးတော့ သီချင်း၊ ဒေါက်ဖိနပ်လျှောက်သံဟာ အဘကိုဒေါက်ဖိနပ်ပိမယ်ဆိုတဲ့ နိမိတ်ဖြစ်သွားပါပြီ။ အဘကို အနားကလူများက အမြဲပြောလေ့ရှိတာက အဘကိုထောက်ခံမှုတွေ လူထုကြားမှာ များနေပြီး သမ္မတတောင်ဖြစ်တော့မလိုပါ။ ဒီနေ့လူထုရဲ့ ကြိုဆိုပုံကအဘကို အခြေအနေမှန်ကို သဘောပေါက်သွားစေနိုင်မှာပါ။ အချိန်တိုအတွင်းမှာ လူစုပြီး အဘလာရာလမ်းမှာ NLD အလံနဲ့ အမေစုကိုထောက်ခံတဲ့ ဒေါက်ဖိနပ်လျှောက်သံ ဆိုနိုင်တာဟာ တော်ရုံစိတ်ဓာတ်နဲ့မရနိုင်ပါ။

တပ်ထဲမှာတော့ လုံခြုံရေးရှုထောင့်အရ အဘဟာ ဘယ်လိုတိုက်ခိုက်ခံရနိုင်တယ်ဆိုတာကို သိသွားကြပါတယ်။

ရွှေဘိုရဲ့ဖြစ်စဉ်က ပြည်မမှာ NLD ဟာ ဘယ်ကြောင့်နိုင်နိုင်လဲဆိုတာ ပြသွားခဲ့သလို ခြေဥမပြင်ရင်ပြည်သူက ဘာလုပ်နိုင်တယ်ဆိုတာကိုလဲ ပြသွားခဲ့ပါပြီ။

ရွှေဘိုရဲ့နိမိတ်က ဦးအောင်ဇေယျက တတိယနိုင်ငံတော် ထူထောင်ခဲ့သလို ရွှေဘိုကလဲ ဖယ်ဒရယ်ပြည်ထောင်စုကို ထူထောင်နိုင်တော့မယ်လို့ နိမိတ်ပြလိုက်တာပါ။

ကျေးဇူးပါ ရွှေဘို။

Photo credit: Smile Ko