သံချောင်းမှပြောသော မြန်မာ့လိုလုပ်ရမယ့်တော်လှန်ရေး

လွန်ခဲ့တဲ့ရက်ပိုင်းက Facebook ပေါ်မှာ အဝါမျဉ်းကိုမဖြတ်နဲ့ သံစထောင်ထားတယ်။ ကားကဖြတ်ရင် ဘီးပေါက်သွားမယ်ဆိုပြီး ကားသမားအချင်းချင်း သတိပေးနေတာတွေ့ရတယ်။ ဒါကဘာကိုပြသလဲ?

အဆိုပါလမ်းကို ဥရောပနိုင်ငံခြားမှာ အဲ့ဒီလို သံထောင်ထားရင် လူ့အခွင့်အရေးနဲ့မညီလို့ဆိုပြီး ဘာညာအပြောခံရမှာပါ။ စည်ပင်တောင်ပြုတ်သွားနိုင်ပါတယ်။ ဒါကိုစည်းကမ်းလိုက်နာအောင်လုပ်လိုရင် CCTV တွေတပ်ရမှာဖြစ်ပြီး ကားတွေရဲ့ နံပတ်ကို ကွန်ပျူတာကနေသိမှလိုက်ဖမ်းလို့ရမှာပါ။ ဒါက မြန်မာပြည်လို လိုင်စင်မဲ့ကားများတဲ့တိုင်းပြည်မှာ လုပ်ဖို့မလွယ်ပါ။

ဒါကိုလမ်းပေါ်အဝါမျဉ်းမှာ သံချထားတော့ အမှန်ပြောရရင် ညစ်ပြီး ဥပဒေစိုးမိုးဖို့ကို ညစ်နည်းသုံးထားတာပါ။ ဒါပေမယ့် ကွန်ပျူတာစနစ်မရှိတဲ့မြန်မာပြည် CCTV မရှိတဲ့မြန်မာပြည်မှာ အချင်းချင်းလိုင်းပေါ်ကသတိပေးပြီး စည်းကမ်းလိုက်နာသွားပါတယ်။ စည်းကမ်းမလိုက်နာရင်လဲ ပေးဆပ်ရမှာက သူ့ကားဘီးပေါက်သွားတာပါ။

ဒီဟာလေးကို တော်လှန်ရေးအနေနဲ့ အတွေးနယ်ချဲ့ကြည့်လိုက်ရင် စာရေးသူတို့တော်လှန်ရေးလုပ်ရာမှာ မြန်မာလိုတွေးပြီး မြန်မာလိုတိုက်ဖို့သာ လိုအပ်ပါတယ်။ အချို့ကစာရေးသူကို NLD အစိုးရကို မဝေဖန်လို့ မကြိုက်သူ NUG ကို မဝေဖန်လို့ မကြိုက်သူရှိပါတယ်။ သူတို့လုပ်တာ အားလုံးကောင်းပါတယ်။ စေတနာလဲပါပါတယ်။ ဒါပေမယ့် DASSK ကအစ မြန်မာလိုလဲတွေးပေးပြီး မြန်မာလိုလုပ်လိုက်ရင် ပိုမြန်သွားနိုင်ပါတယ်။ မနေ့က NUG စီမံဘဏ္ဍာဝန်ကြီးက စာရေးသူပြောလေ့ရှိတဲ့ နိုင်ငံခြားက လက်တွေ့မကူဘဲ လေကူနေတာကိုစာနဲ့ရေးပြောသွားလို့ သဘောကျပါတယ်။ အရေးကြီးတာက စာရေးသူတို့ရဲ့ တော်လှန်ရေးကို နိုင်ငံခြားကဝေဖန်မှာ သိပ်မကြောက်နေဘဲ မိမိရေ၊ မိမိမြေနဲ့ကိုက်တဲ့ တော်လှန်ရေးကို ပုံဖော်ဖို့ပါ။

တော်လှန်ရေးမှာ မိမိက တူမီးသေနတ်ကိုင် တိုက်ရချိန်မှာ ရန်သူက လေယာဉ်နဲ့တိုက်ရင်သုံးတဲ့ စစ်စည်းကမ်းကို လိုက်နာပြီးတိုက်ဖို့က ခက်ပါတယ်။ ဥပမာ ရန်သူက သူ့ယောက္ခမအိမ်ရောက်တုန်း ရေချိုးချိန်မှာ သေနတ်ကိုင်ထားမှာမဟုတ်ပါ။ ဒါကို ရန်သူကလက်နက်မရှိလို့ ဂျနီဗာ ကွန်ဗန်းရှင်းအရ မပစ်ဘဲထားခဲ့ရင် ရန်သူက လေယာဉ်တက်မောင်းပြီး ဗုံးလာကြဲမှာပါ။လိုက်နာနိုင်ရင် ကောင်းပါတယ်။ လေးစားပါတယ်။ အားလုံးတွေးခေါ်နိုင်အောင်ပါ။ စာရေးသူကတော့ အတွေးအခေါ်က ဗမာလိုတွေးမိလို့ဖြစ်ပါလိမ့်မယ်။ အတွေးအခေါ်က လက်တွေ့ကျပြီး နိမ့်ကျသွားရင် ခွင့်လွှတ်ပါ။