စာရေးသူက မအလတပ်ရဲ့ ဆိုက်ဝါးကို လေ့လာရာမှာ မအလရဲ့ အငြိုးကြီးမှု လက်စားချေလိုမှုတွေကိုထည့်သွင်းစဉ်းစားသလို မအလစဉ်းစားတဲ့ မြန်မာလူမျိုးတွေရဲ့ မေ့လွယ်ပျောက်လွယ် ကောက်ရိုးမီးဓလေ့၊ ခွင့်လွှတ်လွယ်တဲ့ ဓလေ့တွေကိုလဲ မအလတပ်နည်းတူ ထည့်သွင်းစဉ်းစားပေးလေ့ရှိပါတယ်။
ယခုသင်္ကြန်ကိစ္စမှာလဲ အဆိုပါနည်းအတိုင်း ခဲပစ်တဲ့နောက်မလိုက်ဘဲ ကြည့်သောသူမြင်ဆိုသကဲ့သို့လက်တွေ့ကိစ္စကို တရားခံရှာကြည့်ပါတယ်။
စရဖက ဂီတပညာရှင်၊ အနုပညာရှင်ကို သုံးမျိုးခွဲထားပါတယ်။ ပထမက သူ့အမာခံလူပါ။ ထိုလူတွေကသူတို့နဲ့ အကြောင်းအမျိုးမျိုးကြောင့် နီးစပ်မှုရှိသူများပါ။ သူ့ကိုထောက်ခံသူများပေါ့။ ဒုတိယကနိုင်ငံရေးအမြင်မရှိလို့ သတ်မှတ်သူများပါ။ သူတို့က သာကူးပေါ့။ တတိယအုပ်စုက DASSK ထောက်ခံပြီး အမာခံအုပ်စုပါ။
မအလက ဂီတပညာရှင်တွေကို စည်းရုံးရာမှာ စရဖ ကျားမှုန်(ခေါ်) ကျော်မျိုးသက်ကတဆင့် ယုန်ကလေးကို အဓိကထားပါတယ်။ ယုန်ကလေးကတဆင့် ထွက်ပြေးသူများကို ပြန်လာဖို့ စည်းရုံးတာ၊ခံဝန်ထိုးတာ လုပ်ခိုင်းပါတယ်။ အဆိုပါ ထွက်ပြေးသူဟာ သာကူးအုပ်စုထဲကဆိုရင် ခံဝန်နဲ့ အဆင်ပြေပါတယ်။ ဒါပေမယ့် ယခင်ကသူ့ကို လိုင်းပေါ်က အကြီးအကျယ်လုပ်ထားသူ DASSK ကို မဲဆွယ်ပေးခဲ့သူဆိုရင်တော့ မလွယ်ပါ။ ထိုသူတွေက ယုန်ကလေးက လှည့်ခေါ်လို့ အဖမ်းခံရင် စရဖခိုင်းတာ လုပ်ရတော့မှာပါ။ အချို့တွေက ပါပီမဇတ်ရိုက်လိုသူတွေလဲ ပါမှာပါ။
အနုပညာရှင်တွေကို အဓိက စည်းရုံးတာက စစ်တပ်နဲ့ သူ့အမျိုးရင်းကနေ အဆက်အသွယ်ရှိတဲ့ မေသဉ္ဇာဦးနဲ့ စိုးမြတ်သူဇာပါ။ မေသဉ္ဇာဦးက အဆဲမခံနိုင်လို့ ဘောမမရိုက်ပေမယ့် သူကအဓိက စီစဉ်ပေးသူပါ။ နောက်စရဖနဲ့ အဆက်အသွယ်ရှိသူ တပ်အမာခံက ခန့်စည်သူပါ။ သူက မျိုးရိုးအရကော စီးပွါးရေးပါ တပ်နဲ့အဆက်အသွယ်ရှိသူပါ။ သူ့ကိုလဲ တပ်က လူအမုန်းမများအောင် ကာကွယ်ပေးထားပါတယ်။ နောက်တပ်နဲ့ အနုပညာသမားများကြား ချိတ်ပေးသူက ဝေဠုကျော်ပါ။ သူက မဘသနွယ်ပြီးတပ်ထောက်ခံသူပါ။ တပ်နဲ့စီးပွါးရေးအရ ဆက်သွယ်မှုရှိသူပါ။
ဒါတွေကိုရေးပြတာက စာရေးသူတို့ ပြည်သူတွေက ဆဲရာမှာ မအလက ထိုးကျွေးသူကိုသာမဆဲဘဲမီးလောင်ရာ ပြဿနာအစကိုသိပြီး မီးဘေးရှောင် မလောင်ခင်တားနိုင်အောင်ပါ။ ဒီမိုတွေဖြစ်သွားတတ်တာက မအလဆဲစေချင်သူတွေကိုဆဲပြီး မအလအနားနေသူကို လွတ်သွားတာမျိုး မဖြစ်အောင်သတင်းအချက်အလက်တွေကို ချပြပေးတာပါ။ တရားမျှတမှုကတော့ ပြည်သူတွေက မိမိဖာသာလုပ်မှသာ ရမှာပါ။ ဝဋ်လည်မှာကိုမစောင့်ဘဲ ဝဋ်လည်အောင် လုပ်ပြရမှာက ပြည်သူ့တာဝန်ပါ။ မီးပျက်တာကို EPC ဆဲတာထက် PDF ကိုလှူရင် ပိုထိရောက်မှာပါ။ ဂီတသမားအားလုံး၊ ရုပ်ရှင်သမားအားလုံးနဲ့ ရန်မဖြစ်ဘဲ အဓိကရန်သူကို ရှာပြီးတိုက်နိုင်ကြပါစေ။