DASSK Facebook သုံးခြင်း၏ အကျိုးကျေးဇူး
- Myat Tun Oo
- Apr 2, 2020
- 1 min read
ဒီနေရာမှာ အတိုက်အခံ အများစုက ဝေဖန်လေ့ရှိတာက သူမဟာ အောက်ခြေမှာ ဖြစ်နေတာတွေကို သိလားဆိုတာဖြစ်ပါတယ်။ ဒီနေရာမှာ အောက်ခြေက ဘာအကြောင်းလဲဆိုတာ ရှိပါတယ်။
ပထမကတော့ သူမရဲ့ ဝကခတွေ ဘာလုပ်လဲဆိုတာပါ။ ဒါကတော့ မဆိုင်းမတွ သိတယ်လို့ ပြောပါ့မယ်။ ဘယ်လိုသိလဲဆိုတော့ သူတို့လုပ်တာကို သမ္မတရုံးတင်ရလို့ပါ။ ဒီကနေ လွတ်သွားတယ်ဆိုပါစို့။သူမအနားက ကိုဇော်ဌေးတို့ အစ်ကိုကြီးမင်းသူတို့က သူမကိုပြောပါတယ်။ သူတို့ရဲ့နောက်ခံက ပါတီကမဟုတ်လို့ သူတို့က ဝကခတွေလုပ်တာကို မညှာတမ်းတင်ပြလေ့ရှိပါတယ်။
နောက်က ပြည်ထောင်စုဝန်ကြီးအဆင့်ပါ။ ဒီမှာတော့ မတင်ပြဖြစ်တာလေးတွေ ရှိနိုင်ပါတယ်။ စက်မှုတို့၊ ဆည်မြောင်းတို့ပေါ့။ အချို့က အဘနဲ့အဆင်ပြေရင် အထက်ကို မတက်တာလဲရှိပါတယ်။ပညာရေးကိစ္စမှာလဲ သူမသိတာ နောက်ကျသွားခဲ့ပုံပါ။ ဒါတွေကတော့ သူမရဲ့ ကိုယ်စားလှယ်တွေ ပါတီက ဝကခအချို့ထံကမှ ပြန်သိလို့ ကြာနိုင်ပါတယ်။
အများစုကတော့ တပ်နဲ့ တိုင်းရင်းသားနယ်မှာ ဖြစ်တာတွေပါ။ ဒါမျိုးတွေက သတင်းတွေမှာ ပါပေမယ့်BBC, VOA, RFA တို့က ဘက်လိုက်သလိုဖြစ်တာရယ် လိုရင်းမရောက်တာရယ်ကြောင့် သူမ နားမထောင်ရင် မသိနိုင်ပါ။ ဒါပေမယ့် Facebook ပေါ်မှာတော့ အားချိန် လိုင်းပေါ်တက်ရင် ပြည်သူတွေကတင်ထားတာတွေ ထိပ်ပိုင်းသတင်းတွေကို သိနိုင်ပါမယ်။ ဒါကြောင့် အောက်ခြေကလူတွေလဲ ယခင်ကထက် ပိုသတိထားလာနိုင်သလို သူမကိုမတင်ပြတဲ့ ပြဿနာအချို့လဲ အလွယ်တကူသိလာနိုင်ပါမယ်။
အရေးကြီးဆုံးကတော့ ပြည်သူတွေနဲ့ တိုက်ရိုက်ဆက်သွယ်နိုင်လို့ ကောလဟာလကို ထိထိရောက်ရောက် ကိုင်တွယ်နိုင်လာမှာပါ။ သူမရဲ့ star power က ဘယ်လောက်ကြီးလဲဆိုတာ သူမနောက်လိုက်အင်အားကို ကြည့်ရင်သိနိုင်ပါတယ်။ သူမကို ကြိုက်တဲ့လူ တစ်သိန်းမှာ တစ်ထောင်လောက်က ဟဟပေးတာဟာ ၀.၁% ရှိတာပါ။ ဒါကြောင့် သူမရဲ့ Facebook ကိုသုံးတဲ့ နည်းဗျူဟာက COVID 19 အတွက်ရော အနာဂတ်အတွက်ပါ ကောင်းတယ်လို့ ပြောပါရစေ။
Comments