COVID 19 က ကြောက်စရာကောင်းလား

ဒါကို သာမန်လူနားလည်အောင် ရေးထားတာကို တင်ပါမယ်။ စာရေးသူက တင်ပေးတာပါ။ တတ်ကျွမ်းသူ အထူးကုဆရာဝန်များက ရေးထားတာကို စာဖတ်သူများသိအောင်သာ တင်ပေးတာပါ။ သတိတရားနဲ့သာ နေကြပါ။ မကြောက်တာရော အကြောက်လွန်တာပါ မကောင်းပါ။

———————————————

ဒီရောဂါဟာ ဝူဟန် သားငါးစျေး (wet market) နဲ့ ထိတွေ့သူတွေမှာ စဖြစ်ပြီး သူတို့နဲ့ တွေ့သူတွေကနေကူးတယ်လို့ အကြမ်းဖျင်းသတ်မှတ်ထားပါတယ်။ ဒီရောဂါဖြစ်ရင် ဘာရောဂါလက္ခဏာတွေ ပြမလဲ?

ချောင်းဆိုးတာ

ဖျားတာ

သလိပ်ထွက်တာ

ကိုယ် ညောင်းညာ ကိုက်ခဲတာ

ခေါင်းကိုက်တာ

အသက်ရူကြပ်တာ

ချောင်းဆိုးသွေးပါတာ

အော့အန်တာ

ဝမ်းလျှောတာတွေဖြစ်ပါတယ်။

ရောဂါဖြစ်သူရဲ့ ၅% ဟာ အထူးကြပ်မတ်ကုသဆောင် (ICU) ကို တင်ရပြီး ၂.၃% က အသက်ရူတဲ့ စက်နဲ့ ကူပေးရပါတယ်။ စုစုပေါင်းလူနာရဲ့ ၁.၄% သေခဲ့ပါတယ်။ ဒါက တရုတ်ပြည်က အချက်အလက်ပါ။

တရုတ်ပြည်မှာ ဖေဖော်ဝါရီ ၁၁ ၂၀၂၀ အထိ လူပေါင်း ၇၂၃၁၄ မှာ ဖြစ်ခဲ့ပါတယ်။ အများစု ၈၀.၉% ကနှာစီး၊ ချောင်းဆိုလောက်သာ ဖြစ်ခဲ့ပါတယ်။ အောက်ဆီဂျင်တွေဘာတွေလိုတဲ့ ပြင်းထန်လူနာကတော့၁၃.၈% မှာ ဖြစ်ခဲ့ပြီး အသည်းအသန် အထူးကြပ်မတ်ကုသဆောင်အဆင့် အသက်ရူစက်လိုတာ၊ကျောက်ကပ်ဆေးတာကတော့ ၄.၇%မှာပါ။

ဝူဟန်ဆေးရုံက လူနာတွေကိုလေ့လာရာမှာ ၈၄% က ရောဂါမပြင်းဘဲ ၁၉% (၁၇၃ ယောက်) ကသာရောဂါပြင်းပြီး အဲ့ဒီရောဂါပြင်းသူ ၁၇၃ ယောက်ရဲ့ ၅% က အထူးကြပ်မတ်ဆောင်ကို ရောက်ခဲ့ပါတယ်။ အဆိုပါ ၁၇၃ ယောက်ရဲ့ ၂၀ % ကတော့ သေခဲ့ပါတယ်။

ဒါကြောင့် အကြောက်မလွန်ပါနဲ့။ အများစုက တုတ်ကွေးလိုသာခံစားပြီး ပြီးသွားမှာပါ။ အသက် ၆၅အထက်တွေ၊ ဆီးချို၊ နှလုံး၊ ပန်းနာရင်ကြပ်ရှိသူတွေ၊ ကင်ဆာဆေးသောက်နေသူတွေကတော့ အပြင်လုံးဝ မထွက်သင့်ပါ။

အိမ်ထဲမှာနေပါ။ လိုအပ်မှ အပြင်ထွက်ပါ။ လက်ဆေးပါ။ လူတစ်ယောက်နဲ့တစ်ယောက် ၆ ပေအကွာမှာနေပါ။

Reference: https://www.nejm.org/doi/full/10.1056/NEJMoa2002032

https://www.nejm.org/doi/full/10.1056/NEJMoa2001017?query=featured_home

https://www.nejm.org/doi/full/10.1056/NEJMoa2001316