၂၀၂၁ မှသည် ၂၀၂၂ ဆီသို့

၂၀၂၁ ဟာ အာဏာသိမ်းခံခဲ့ရ လူတွေသေကြရလို့ မကောင်းတဲ့နှစ်လို့ ပြောလို့ရပါတယ်။ ဒါပေမယ့်၂၀၂၁ ဖေဖော်ဝါရီ မှာ အာဏာသိမ်း မခံခဲ့ရရင်တောင် NLD အစိုးရက ခြေဥပြင်မှာနဲ့ မအလကိုသက်တမ်းမတိုးဘဲ ဖြုတ်မှာမိုလို့ မအလတပ်နဲ့က ဖေဖော်ဝါရီမှာ ထိပ်တိုက်မတွေ့လဲ ဇူလိုင်မှာ တွေ့မှာပါ။

အဆိုးထဲက အကောင်းကဘာလဲ? ဒုတိယကမ္ဘာစစ်မှာ လူပေါင်းများစွာ သေခဲ့သလို အိုးအိမ်များစွာပျက်စီးခဲ့ပါတယ်။ နှစ်ပေါင်းများစွာ တိုက်ခိုက်ခဲ့ရပါတယ်။ ဒါပေမယ့် နာဇီနဲ့ဖက်ဆစ်ကို အောင်နိုင်ခဲ့ပါတယ်။ ထို့အတူပါဘဲ မြန်မာပြည်မှာ အာဏာသိမ်းပြီး လူထောင်ပေါင်းများစွာ သေခဲ့သလို သေနေဆဲပါ။ အိုးအိမ်စွန့်ခွါရသူတွေလဲ သိန်းချီရှိနိုင်ပါတယ်။ နောက်ပိုင်း ယခုထက်များလာနိုင်ပါတယ်။ ဒါပေမယ့် ယခုအချိန်မှာ တိုင်းသူပြည်သားအားလုံးဟာ NLD လက်ထက်က ၇၅% ဒီမိုကရေစီတောင် မအလထက် ဘယ်လောက်ပိုကောင်းလဲ သိနေကြပါပြီ။ ဒါတင်လားဆိုတော့ မဟုတ်သေးပါ။ ဒီမိုကရေစီရဖို့ပြည်ပအားမကိုးဘဲ ကိုယ့်အားကိုယ်ကိုးပြီး တိုက်ယူမှရမယ်ဆိုတာလဲ သိသွားကြပါပြီ။ တိုင်းရင်းသားစည်းလုံးညီညွတ်ရေးဟာလဲ ပင်လုံစာချုပ်အပြီး အကောင်းဆုံးအချိန်လို့တောင် ပြောလို့ရနေပါပြီ။လူငယ်တွေက ဂိမ်းမဆော့ဘဲ သေနတ်ကိုင်နေကြပါပြီ။

ဒါထက်ကောင်းတာက CRPH တို့ NUG တို့ ပေါ်လာပြီး ပြည်သူတွေမှာ တပ်ပိုင် PDF ရှိလာတာပါ။ ယခုအချိန် ကုလက အပြစ်ရပ်ဆိုရင်တောင် စာရေးသူတို့မှာ ထိန်းချုပ်ထားတဲ့ နယ်မြေတွေရှိလာနေပါပြီ။ဒါက ၂၀၂၁ ရဲ့ အဆိုးထဲက အကောင်းပါ။

ဒါဆို ၂၀၂၂ မှာ ဘာဖြစ်မလဲ? စာရေးသူ ခဏခဏ ရေးခဲ့သလို ၂၀၂၂ မေလမှာ စစ်ရဲ့ ချိန်ခွင်ဟာအပြောင်းအလဲဖြစ်မှာပါ။ ယခင် NUG က အလှူငွေကောက်ရင် မအလတပ်ရဲ့ နှောက်ယှက်မှုကို ခံရလေ့ရှိပါတယ်။ ယခု PRF အစီအစဉ်က အဆိုပါနှောက်ယှက်မှုကို ကျော်လွှားနိုင်မှာဖြစ်ပြီး လစဉ်စစ်အသုံးစားရိတ်ရလာမှာပါ။ နောက်အမေရိကန်ထံကလဲ ဘယ်လဲဘာလဲဆိုတာ မေလလောက်မှာသဲသဲကွဲကွဲသိလာမှာပါ။ ဘယ်သူမှ မထောက်ပံ့ခဲ့ရင်တောင် PRF ကနေ လက်နက်က အတိုင်းအတာတစ်ခုအထိ အဆင်ပြေလာမှာပါ။ မေလနောက်ပိုင်း မိုးရွာမှာမိုလို့ မအလတပ်ရဲ့ လေကြောင်း အားသာချက်ကိုလဲ ရှောင်နိုင်မှာပါ။ တူမီးမဟုတ်လို့ မိုးထဲမှာလဲ ပစ်လို့ရလာမှာပါ။ လက်နက်ပိုရလာရင် PDF တွေက ပိုများလာမှာပါ။ လက်နက်ပြည့်စုံတဲ့ PDF များလာရင် နယ်မြေပိုစိုးမိုးလာမှာပါ။ ဥပမာ ယခုကလက်နက်မရှိလို့ မိုင်းဆွဲပြီးရင် မိုင်းထိထားသူ မိုင်းမထိသူကို ဘာမှမလုပ်နိုင်ဘဲ ထွက်ပြေးခဲ့ရပါတယ်။ လက်နက်ရှိလာရင် KIA၊ KNU တို့တိုက်သလို မိုင်းဆွဲပြီး ဝိုင်းပစ်နိုင်မှာပါ။ ဒါဆို မအလတပ်တပ်လုံးပြုတ်လာမှာပါ။ တပ်လုံးပြုတ်တာများလာရင် မအလအပေါ် ဖိအားက များလာမှာပါ။ ဒီဖိအားက ကုလကြေညာချက်ထက် ပိုထိရောက်ပါတယ်။

အကျဉ်းချုပ်ရရင် ၂၀၂၁ မှာ စိတ်မကောင်းစရာတွေရှိပေမယ့် ၂၀၂၂ ဟာ အောင်ပွဲနဲ့ နီးလာတဲ့နှစ်ဖြစ်မှာပါ။