ဦးတီမှပြောသော ရင်ကြားစေ့ရေး
မနေ့က ပြည်သူ့လွှတ်တော်ဥက္ကဌကို ရာထူးကဖယ်ရှားဖို့ ဖွတ်အမတ်က အဆိုတင်ပါတယ်။ အဆိုတင်သူက အဘတပ်ထိုင်ထားတဲ့ မိုင်းပြတ်ကဖွတ်အမတ် စိုင်းထွန်းစိန်ပါ။ သူက အမတ် ၁၁၀ ရဲ့ လက်မှတ်လိုတာကြောင့် အဘကလုပ်ခိုင်းလို့ လုပ်တာထင်ရှားပါတယ်။
ဦးတီကို ရှမ်းပြည်က တပ်လက်အောက်မှာရှိတဲ့ ပြည်သူ့စစ်က ဘိန်းလုပ်လို့ဝင်ဖမ်းတာကို ဘာမှမဆိုင်ဘဲ ကောလဟာလထုတ်ကထဲက ဘာလို့ဒီလိုလုပ်ရတာလဲလို့ သံသယဝင်ခဲ့ပါတယ်။ သတင်းထောက်ဟာ ဖွတ်နဲ့တပ်ကအကောင့်တုကတင်တဲ့ ကောလဟာလကို သတင်းစာရှင်းလင်းပွဲမှာ မေးသွားတာပါ။စာရေးသူတို့ ပြည်တွင်းကသတင်းထောက်တွေကလဲ ဖွတ်တွေနဲ့ အနောက်နိုင်ငံကသိချင်တာသာ မေးပေးပုံပါ။
ဒီကိစ္စမဖြစ်ခင် စာရေးသူက စစ်တမ်းကောက်ပါတယ်။ ဒါဟာ သိပ္ပနည်းကျမဟုတ်ပေမယ့် ပေါ်လစီချမှတ်သူတွေအနေနဲ့ အတိုင်းအတာတစ်ခုအထိ အသုံးဝင်မယ်လို့ ထင်ပါတယ်။
စာရေးသူရဲ့စစ်တမ်းကို ၃၁၁၈ ယောက်ကဖြေခဲ့ပါတယ်။
ပထမမေးခွန်းက အမျိုးသားရင်ကြားစေ့ရေးအပေါ်သဘောထားပါ။
၉၃.၅% က မအောင်မြင်ပါလို့ သုံးသပ်ပြီး ၆.၅% ကသာ အောင်မြင်တယ်လို့ ဖြေကြပါတယ်။
ဒုတိယမေးခွန်းက အမျိုးသားရင်ကြားစေ့ရေး မအောင်မြင်ပါက မည်သူ့ကြောင့်လဲလို့မေးထားပါတယ်။
၇၂.၁% က ဗိုလ်ချုပ်မှူးကြီးမင်းအောင်လှိုင် ကန့်လန့်တိုက်လို့ မအောင်မြင်တာလို့ ဖြေကြပြီး ၂၅% ကဒေါ်အောင်ဆန်းစုကြည်ကြောင့် မအောင်မြင်တာလို့ ဖြေပါတယ်။ ၂.၉% က အောင်မြင်တယ်လို့ ဖြေပြီးလို့ မဖြေတော့ပါ။
တတိယမေးခွန်းက ၂၀၂၀ ရွေးကောက်ပွဲမှာ ဘယ်ပါတီကိုမဲပေးရန် ဆန္ဒရှိပါသလဲ လို့မေးပါတယ်။
၇၅% က NLD ကိုမဲပေးမယ်လို့ဖြေပြီး ၁၃.၉% က အခြားအတိုက်အခံပါတီ ၉.၂% က ဖွတ်ပါတီနဲ့၊၁.၉% က တိုင်းရင်းသားပါတီကို မဲပေးမယ်လို့ဖြေကြပါတယ်။
နောက်ဆုံးမေးခွန်းဖြစ်တဲ့ လက်ရှိအစိုးရရဲ့ ကပ်ရောဂါကိုင်တွယ်ပုံကို ၇၅.၇% က သဘောကျတယ်လို့ဖြေဆိုခဲ့ပြီး ၂၄.၃% ကတော့ သဘောမကျပါလို့ ဖြေခဲ့ပါတယ်။
အကျဉ်းချုပ်ရရင် ပြည်သူအများစု ၉၃.၅% က ရင်ကြားစေ့ရေးဟာ မအောင်မြင်ဘူးလို့ သုံးသပ်ကြပါတယ်။ သူတို့သုံးသပ်တာမှန်ကြောင်းကို မနေ့က ဦးတီကို အဆိုတင်ပြီး ဖြုတ်ချဖို့လုပ်တာကသက်သေပြလိုက်ပါတယ်။ ဦးတီဟာ သူတို့ပါတီက တက်လာခဲ့ပြီး သူတို့လူဟာ DASSK နောက်ပါသွားလို့ လိုက်ဒေါက်ဖြုတ်နေပုံပါ။ ဘကျော်ဆွေကို ပြန်ခေါ်သလိုပေါ့။ DASSK ဟာ သူမအနားကလူတွေကိုစည်းရုံးရာမှာ အလွန်အောင်မြင်နေပါတယ်။ ဒါပေမယ့် ကန့်လန့်တိုက်သူကတော့ ဆက်ကန့်လန့်တိုက်နေပုံပါ။ စစ်တမ်းရဲ့ကောင်းတဲ့အချက်က ပြည်သူအများစုက NLD ကိုသာ ဆက်မဲပေးဖို့ရှိတာနဲ့ ကပ်ရောဂါကိုင်တွယ်ပုံကို သဘောကျကြတာပါ။
ရင်ကြားစေ့ရေးပေါ်လစီကိုတော့ ပြန်သုံးသပ်နိုင်လိမ့်မယ်လို့ ထင်ပါတယ်။ ၂၀၂၁ မှာတော့ တစ်ခုခုဗျူဟာပြောင်းရမှာပါ။