အဘအတွက် အဆုံးအဖြတ်အချိန်များ

အဘအတွက် အဆုံးအဖြတ်အချိန်များ

မအလဟာ လူသစ်စုနေချိန် ရှမ်းမြောက်အပစ်ရပ်ချိန်မှာ စစ်ကိုင်းကို ထိုးစစ်ဆင်အပြီး ရှမ်းတောင် ကယားဘက်ကို တန်ပြန်ထိုးစစ် ဆင်ခဲ့ပါတယ်။ အလုံးစုံမအောင်မြင်ပေမယ့် သူစစ်ရှုံးနေတဲ့ အခြားဒေသတွေထက်စာရင် သူ့တပ်ထိုးဖောက်နိုင်ခဲ့ပါတယ်။ ထို့အတူ အောင်ဇေယျက ရှေ့မတိုးနိုင်ပေမယ့် မြဝတီကိုတော့ ဟန်မပျက် ထိန်းပြနိုင်ခဲ့ပါတယ်။ ကရင်ဘက်မှာ သူ့ထံကို ထိုးစစ်အကြီးမလာတော့တာ အားလုံးသတိထားမိမှာပါ။ ထိုအချိန်မှာ မအလရဲ့ ဗိုလ်ချုပ်ကြီးမောင်မောင်အေးတို့က လူသစ်တွေနဲ့ ရှမ်းမြောက်မှာ ထိုးစစ်ဆင်ဖို့ပြင်ထားခဲ့ပါတယ်။

ဒါကြောင့် MNDAA, TNLA တို့ဟာ သူ့မတိုက်လဲ မအလက သူတို့ကို အချိန်တန်ရင် သွားတိုက်မှာပါ။ ရှမ်းမြောက်လားရှိုးမှာလဲ ထိုးစစ်အတွက် လက်နက်အင်အားဖြည့်ထားသလို ဒရုံးနဲ့လဲ ၂၄နာရီ စောင့်ကြည့်နေခဲ့ပါတယ်။ ကယားထိုးစစ်မှာ ဒရုံးကအောင်မြင်ခဲ့လို့ အဆိုပါနည်းပညာကို ယူသုံးခဲ့ပါတယ်။ ယခုရှမ်းမြောက်မှာက အလစ်အငိုက်မဟုတ်ဘဲ ဝ UWSA တပ်တွေ ရွှေ့ပြောင်းတာကို ကြိုသိခဲ့ပါတယ်။ ဗုံးကြဲပြီး လက်ဦးမှုရယူတိုက်မလားဆိုတာကို မအလက ပေးမတိုက်ခဲ့ပါ။ ဒီသတင်းကို ဘောမသတင်းတွေမှာမတက်ခင် စရဖက ကြိုသိခဲ့ပြီး မအလက အရေးမယူလို့ ဖိအားပေးတဲ့သဘောနဲ့ ဘောမတွေထံကို သတင်းပို့ခဲ့တာပါ။

ယခုစစ်ပွဲတွေကဘာထူးမလဲ? ယခု ရခိုင်က သံတွဲ၊ အမ်းနဲ့ ရှမ်းမြောက်က လားရှိုး၊ နောင်ချိုတို့က မအလရဲ့ ကံကြမ္မာအထိ အဆုံးအဖြတ်ပေးနိုင်ပါတယ်။ စနစ်ပျက် မပျက် မသိပေမယ့် မအလပြုတ် မပြုတ်လောက်အထိတော့ ဆုံးဖြတ်သွားနိုင်လို့ပါ။ ယခု မအလဟာ ရှိသမျှ ပုံအောပြီး လားရှိုး၊ သံတွဲ၊ အမ်း၊ နောင်ချိုကို ခံတိုက်နေပါတယ်။ မောင်းတောမှာ ရိုဟင်ဂျာလက်နက်ကိုင်တွေက မအလတပ်နဲ့ ဝိုင်းကူတိုက်ပေးလို့ AA ထင်သလောက်မြန်မြန် မသိမ်းနိုင်တာကို မအလက သဘောကျနေပါတယ်။ သူတို့တွေက တိုက်ရည်ခိုက်ရည်ရှိလို့ မအလက သံတွဲအထိ ခေါ်သုံးဖို့လဲ စဉ်းစားနေပါတယ်။ AA က မောင်းတောကို မသိမ်းနိုင်ခဲ့ရင် မအလတပ်က ရိုဟင်ဂျာတွေနဲ့ မြောက်ဘက်က ဆုံးရှုံးထားတဲ့ နယ်မြေတွေကို ပြန်သိမ်းဖို့ သူတို့ကို BGF လို ခန့်ဖို့၊ ကိုယ်ပိုင်အုပ်ချုပ်ခွင့် ပေးဖို့အထိ သဘောတူထားပါတယ်။ အဆိုပါနယ်တွေမှာ ရိုဟင်ဂျာတွေက သူတို့ဖာသာ အုပ်ချုပ်လို့ရမှာပါ။ သူတို့က မအလဘက်က တိုက်ပေးရမှာပါ။ ဒါပေမယ့် ရခိုင်အတွင်းအထိ ခေါ်လာခဲ့ရင် မဘသနဲ့ ပြဿနာတက်နိုင်လို့သာ မခေါ်သေးတာပါ။ ရှမ်းမြောက်မှာလဲ ပုံအောပြီး ခုခံထားပါတယ်။ ဒါဆိုရင် ဘာဆက်ဖြစ်မလဲ?

မအလက သံတွဲ၊ အမ်း၊ လားရှိုး၊ နောင်ချိုမကျအောင် ထိန်းနိုင်ခဲ့ရင် တပ်ထဲမှာ နာမည်ရလာပြီး အတင့်ရဲလာတဲ့ မအလတပ်ဟာ လူသစ်တွေနဲ့ ထိုးစစ်ပြန်ဆင်လာပါမယ်။ အကယ်၍ သံတွဲ၊ အမ်း၊ လားရှိုး၊ နောင်ချိုကျခဲ့ရင် မအလဟာ တရုတ်ကတဆင့် အပစ်ရပ်ဖို့ ထပ်လုပ်ပြီး အချိန်ထပ်ဆွဲလာနိုင်ပါတယ်။ ဒါပေမယ့် ဒီအချိန်မှာတော့ မအလကိုယ်တိုင် ရာထူးကဆင်းပးရတာ တပ်ထဲမှာ မအလကို ဖြုတ်ချတာအထိ ဖြစ်လာနိုင်နေပါတယ်။ မအလပြုတ်တာဟာ ဒီမိုကရေစီရတာမဟုတ်ပေမယ့် အဆင့်တစ်ခုကို တက်လှမ်းသွားနိုင်ပါမယ်။ ဒါမှမဟုတ် မအလက သေသည်အထိ သီပေါမင်းလို ကိုယ့်တပ်ကိုယုံပြီး ခံချသွားတာလဲ ဖြစ်နိုင်ပါတယ်။

ဒီနေရာမှာ စစ်သဘောအရ စိတ်ဓာတ်၊ လူအင်အား၊ လက်နက်တွေလိုပြီး လက်နက်ကောင်းဖို့က ငွေလိုပါတယ်။ ပြည်သူက မိမိရလာတဲ့ အခွင့်အရေးကို ပိုင်ပိုင်နိုင်နိုင် အသုံးချနိုင်ဖို့ NUG အောက်က PDF ကို ယခုထက်ပိုအားကောင်းအောင် ထောက်ပံ့ပေးကြပါ။ အခြားတပ်တော်တွေနဲ့ ပိုက်ဆံမဖြုန်းပါနဲ့။ တပ်တော်တွေက ဘာမှမသိမ်းပြနိုင်ဘဲ မန္တလေး PDF လို NUG အောက်က PDF ကသာ မြို့သိမ်းနိုင်တာပါ။ ပြည်သူတွေ မအလအခက် ပြည်သူအချက်ဖြစ်နိုင်အောင် NUG အောက်က PDF ကို ဆထက်တစ်ပိုးတိုး ထောက်ပံ့ကြပါ။ ပန်းတိုင်က နီးနေပြီး ကမ္ဘာပေါ်က လက်နက်ကိုင်တော်လှန်ရေးတွေထဲ မြန်မာ့တော်လှန်ရေးက ပြည်တွင်းအားသာ အဓိကထားနေလို့ ပြည်သူက ကြည်ဖြူစွာ ကူညီနိုင်ပါစေ။