အဘကို လျှော့တော့ မတွက်ပါနဲ့

ရွေးကောက်ပွဲကြီးဟာ အင်မတန်မှ နီးလာပြီဖြစ်ပါတယ်။ တိုက်တိုက်ဆိုင်ဆိုင် ဒီရွေးကောက်ပွဲအပြီးနောင်နှစ်မှာ တပ်ချုပ်ဟာလဲ သူတိုးခဲ့တဲ့ သက်တမ်းကပြည့်မှာပါ။ ဒါကြောင့် ဒီနိုဝင်ဘာရွေးကောက်ပွဲမှာ တပ်ချုပ်ကြီးနဲ့ ရင်းနှီးတဲ့ပါတီတွေကသာနိုင်ခဲ့ရင် တပ်ချုပ်ကြီးအတွက် ပွဲပြီးပါပြီ။ တပ်ထဲကထွက်ပြီး ဖွတ်ပါတီကနေ ရွေးကောက်ပွဲဝင်မည့်သူများကိုလဲ အထက်ကနေ ရွေးထားပြီးပါပြီ။ အချို့ကအရန်အင်အား အချို့က လက်ရှိထဲကလို့ ကြားပါတယ်။ အချို့ ထင်မထားသူတစ်ယောက်လဲ ပါနိုင်ပါတယ်။ တပ်ချုပ်မအလမှာ သမ္မတဖြစ်ချင်စိတ်တွေရှိနေတယ်ဆိုတာက အင်မတန်သိသာပါတယ်။

ပုံမှန်မှာဆို သူကဖြစ်နိုင်လားဆိုတော့ မဖြစ်နိုင်ပါ။ ဒါပမယ့် စာရေးသူရဲ့ ဘာမဟုတ်တဲ့ သူနဲ့ကွီးဖြိုးကိုပြည်သူက ဘယ်သူ့ကိုပိုယုံလဲဆိုတဲ့ စစ်တမ်းမျိုးကိုတောင် အုံနဲ့ကျင်းနဲ့ လိုင်းပေါ်မှာ မဲခိုးဖို့လုပ်တာကိုတွေ့လိုက်ရချိန်မှာ သူဟာဒီလိုကိစ္စလေးကိုတောင် အထိမခံပါလားဆိုတာ သိလိုက်ရပါတယ်။ ဒါဆိုသူက ဘာဗျူဟာကို ကျင့်သုံးမလဲ?

ပထမကတော့ ဖွတ်ကျော်ငြိမ်းနဲ့ ဌေးအောင်လို လိုင်းပေါ်ကနေ DASSK အသုံးမကျဘူးဆိုပြီး ဗလိုင်းကြီးအော်တာပါ။ ဒါပြီးရင် ကိုကိုကြီးလို ညွန့်ပေါင်းအစိုးရနဲ့မှ တိုင်းပြည်တိုးတက်မယ်ဆိုတဲ့ လေပြေလေးနဲ့ပြောပြီး အချို့ကတော့ ဒေါက်ခိုင်လို လွှတ်တော်က ၂၅% နဲ့ ကာရာအိုကေဆို အရက်သွားသောက်ပြီး ခြေဥပြင်မယ်ဆိုသူများပါ။ ဒါနဲ့ အားမရသေးဘဲ တပ်ထွက်မှကြိုက်ပြီး ဖွတ်ပါတီကိုတော့မဲမပေးဘူးဆိုသူများအတွက် စုဆောင်းထားတာလေးနဲ့ ပါတီထောင်ထားတဲ့ ဘရွှေမန်းပါတီရှိပါတယ်။သူတို့အားလုံးရဲ့တူညီတဲ့ရည်မှန်းချက်က ပြည်မမှာ ရသလောက်မဲနိုင်ဖို့ပါ။ ယခုဗျူဟာက ယခင်ဖွတ်နိုင်ခဲ့တဲ့ နေရာတွေကို သူတို့က ရသလောက်ထိန်းထားပြီး NLD နိုင်ထားတဲ့ နေရာတွေကို သူတို့ရဲ့အခွဲတွေနဲ့ ပြန်နိုင်အောင်လုပ်ဖို့ပါ။ ဥပမာ ဘရွှေမန်းပါတီက အများကြီးမနိုင်နိုင်ပေမယ့် ဘရွှေမန်းဝင်ပြိုင်မယ့် နေရာမျိုးက နိုင်မယ်လို့ သူတို့ကထင်နေပါတယ်။ ဒါ့အပြင် ကိုကိုကြီးပါတီကလဲ အများကြီးမနိုင်နိုင်ပေမယ့် နှစ်နေရာ သုံးနေရာမျိုးနိုင်မယ်လို့ သူတို့ကတွက်ထားပါတယ်။ PPP ပါတီကလဲ နှစ်နေရာသုံးနေရာလောက် နိုင်မယ်လို့ တွက်ထားပါတယ်။ အချို့နေရာတွေမှာ တပ်မဲတွေဟာ နိုင်ခြေရှိတဲ့ပါတီကို ပုံအောသွားနိုင်အောင်ပြင်ထားပါတယ်။

ယခုရွေးကောက်ပွဲမှာ တပ်တွင်းမဲရုံမထားခိုင်းလို့ အဘအတွက် အားနည်းချက် ဖြစ်သွားပါတယ်။ ဒါကိုပြန်ဖာထေးနိုင်တဲ့အချက်က ရက် ၉၀ အတွင်းနေထိုင်သူက မဲပေးနိုင်တာပါ။ ဒီကိစ္စဟာ ရခိုင်နဲ့ ရှမ်းမှာအဘအတွက်အားသာနိုင်ပါတယ်။ ဥပမာ ရခိုင်ရသေ့တောင်မှာ တပ်တွေသွင်းထားရပြီး ရသေ့တောင်ကလူက စစ်ပြေးရှောင်နေရင် အဘပါတီသာနိုင်ပါတယ်။ ဒါပေမယ့် အဲ့ဒီနေရာတွေဟာ ANP အပြတ်နိုင်ထားလို့ ဒီတပ်ဂဏန်းလောက်က မဆုံးဖြတ်နိုင်ပေမယ့် ရခိုင်တောင်မှာတော့ ရခိုင်နှစ်ပါတီနဲ့ NLDရှိလို့ အဘစားနိုင်ပါတယ်။ ရှမ်းပြည်မှာလဲ အဘက စားနိုင်ပါတယ်။ SNLD အနေနဲ့ မိမိနိုင်နိုင်တဲ့ နေရာတွေမှာ ရက် ၉၀ အတွင်းပြောင်းလာသူတွေရဲ့ မဲတွေနဲ့ အဝုန်းမခံရအောင် သတိထားရမှာပါ။ အချို့ပြောင်းရွေ့တဲ့တပ်တွေဟာ သူတို့ပင်မတပ်ရင်းမှာလဲ ကြိုတင်မဲမပေးအောင် ကြီးကြပ်ရပါမယ်။ ဥပမာပဲခူးကတပ်ရင်းဟာ ရခိုင်မှာ စစ်ဆင်ရေးသွားနေရင် ပဲခူးမှာလဲကြိုတင်မဲပေး ရခိုင်မှာလဲ ရက် ၉၀ မူနဲ့မဲပေးရင် နှစ်သီးစား ဖြစ်သွားပါမယ်။ ဒါမျိုးမလုပ်နိုင်အောင် ပြည်မပါတီ၊ တိုင်းရင်းသားပါတီတွေနဲ့ပြည်သူတွေက စောင့်ကြည့်ရပါမယ်။ မဲစာရင်းဟာ အသက်ပါ။

နောက်ဗျူဟာက Facebook မှာ အဘမွေးထားတဲ့ အကောင့်တွေနဲ့ အဘပေးထားတဲ့ မီဒီယာတွေပေါင်းပြီး လက်ရှိအစိုးရကရွေးထားတဲ့ လူအချို့ကို တိုက်ခိုက်ဖို့ပါ။ NLD အထဲမှာ ကိုယ်စားလှယ်ရွေးချိန်မှာမစည်းရုံးရင် အဘက ကောက်စားသွားမှာပါ။ ဒါတွေကိုလဲ သတိထားရပါမယ်။ နောက်ဆုံးနည်းကတော့ ဘုန်းကြီးတွေနဲ့ပေါင်း ဘုရားတည်သရောင်နဲ့ ရိုက်စားဖို့ပါ။ အမျိုး ဘာသာပေါ့။ အကွက်တွေက သိပြီးသားလို့ ထင်ရပေမယ့် ငပိန်းအချို့က ကြိုက်ပါတယ်။

ပုံမှန်မှာဆို မိုးပေါ်က သိကြားမင်းကဆင်းပြီး မဲဆွယ်တာတောင် အဘ မနိုင်နိုင်ပါ။ ဒါပေမယ့် NLD အတွင်း ကိုယ်စားလှယ်ရွေးတာကနေ အချင်းချင်းတိုက်ရင်တော့ အဘက ကောက်စားနိုင်ပါတယ်။ အဘကို လျှော့မတွက်ပါနဲ့။

(ယခုရေးသားချက်များသည် အဘ၏ ဗျူဟာကိုသာ ရေးသားထားခြင်းဖြစ်ပြီး သတိထားရန်ဖြစ်ပါသည်။ စာရေးသူ၏ မည်သူနိုင်မလဲ ဆောင်းပါးကို နောက်မှ ရေးပါမည်။)