ယခုအချိန်မှာ ဒီမိုကရက်ပါတီက သမ္မတအရွေးခံရသူ ဂျိုးဘိုင်ဒန်ဟာ သမ္မတဖြစ်ဖို့ သေချာသလောက်ဖြစ်သွားပါပြီ။ သူဟာ မြန်မာပြည်ကို နှစ်ခါလာခဲ့တဲ့ အိုဘားမားရဲ့ ဒုသမ္မတပါ။ သူက မြန်မာပြည်ဘယ်မှာရှိသလဲဆိုတာကိုသိသလို မြန်မာပြည်အကြောင်းကို ထရမ့်ထက်ပိုသိမှာ သေချာပါတယ်။DASSK နဲ့လဲ ဓာတ်ပုံတွဲရိုက်ဖူးပါတယ်။ ဒါကြောင့် အပေါ်ယံကြည့်ရင်တော့ အဆင်ပြေသလိုရှိပါတယ်။ သူသမ္မတဖြစ်ရင် မြန်မာနဲ့ အမေရိကန် ဆက်ဆံရေးဘယ်လိုဖြစ်မလဲ? ပိုအဆင်ပြေလာမလား?
သမ္မတ ဘိုင်ဒန်ဟာ DASSK နဲ့ မြန်မာပြည်အကြောင်းကို အကြမ်းအားဖြင့် သိပြီးသားဖြစ်မှာပါ။ အိုဘားမားလက်ထက် ဒီမိုကူးပြောင်းခဲ့တဲ့နိုင်ငံအဖြစ် သူသိမှာပါ။ ဘာအောင်မြင်လဲ ဘာမအောင်မြင်လဲဆိုတာလဲ သူသိမှာပါ။ DASSK အနေနဲ့ သမ္မတထရမ့်ထက် ပိုပြီးပြောဆိုရ ရှင်းပြရလွယ်ကူနိုင်ပါတယ်။ သူမကို ပိုနားလည်ပေးနိုင်ပါတယ်။ ဒါက ကောင်းတဲ့ဘက်ကကြည့်ပြီး သုံးသပ်တာပါ။
အခြားဘက်က ကြည့်ကြရအောင်။ ဂျိုးဘိုင်ဒန်ဟာ ဒီမိုကရက်ပါတီကို ကိုယ်စားပြုတက်လာတာပါ။ ဒီမိုကရက်သဘောအရ လက်ဝဲအနည်းငယ်ယိမ်းပါတယ်။ တန်းတူအခွင့်အရေး အသားအရောင်မခွဲခြားရေး၊ ကျားမ တန်းတူအရေးကို ဦးစားပေးသလို တိုင်းပြည်ထဲ ခိုးဝင်လာသူများကိုလဲ စာနာပါတယ်။ ထရမ့်က အုတ်တံတိုင်းလုပ်ပေမယ့် သူကဖျက်မှာပါ။ အကျိုးဆက်က သူ့ကို ထောက်ခံသူတွေဟာ ဒီမိုကရက်ပါတီကတဆင့် မြန်မာပြည်ကို ဘင်္ဂါလီအရေး ဖြေရှင်းပေးဖို့ ဖိအားပေးဖို့က ထရမ့်ထက် ပိုများပါတယ်။ ဥပမာအနေနဲ့ ကနေဒါက ဝန်ကြီးချုပ် Justin ထရူဒိုဟာ DASSK နဲ့သိပေမယ့် ယခုအချိန်မှာမြန်မာကို ဖိအားပေးဖို့ ICJ မှာ စလုပ်လာနေပါပြီ။
ထရမ့်လက်ထက်မှာက မြန်မာပြည်ကို စီးပွါးရေးပြန်ပိတ်ဖို့ကို လက်မှတ်မထိုးခဲ့ပါဘူး။ ပထမအချက်က သူကမြန်မာကို တရုတ်နိုင်ငံအောက်မပါစေလိုတာနဲ့ သူက သိပ်စိတ်မဝင်စားတာလဲ ပါသလို သူကိုယ်တိုင်က တံတိုင်းလုပ်နေသူမိုလို့ စာနာပါတယ်။ ဒုတိယအချက်က အမေရိကန်အထက်လွှတ်တော်မှာ လူများစုအမတ်ခေါင်းဆောင် Senator Mitch McConnell က မြန်မာပြည်ကို စီးပွါးရေးပိတ်ဆို့တဲ့ဥပဒေကို DASSK ရှိနသမျှ မလုပ်ဖို့ တားထားလို့ပါ။ ကံကောင်းတာက Senator Mitch McConnell ဟာဒီနှစ်မှာလဲ အထက်လွှတ်တော်အမတ်အနေနဲ့ ပြန်အရွေးခံခဲ့ရပါတယ်။
အကျဉ်းချုပ်ပြန်သုံးသပ်ရရင် သမ္မတဂျိုးဘိုင်ဒန်တက်လာလို့ မြန်မာပြည်အနေနဲ့ မိမိကိစ္စတွေကိုပုဂ္ဂိုလ်ရေးအရ ရင်းနှီးစွာပြောပြခွင့်ရလာမှာဖြစ်ပါတယ်။ ဒါပေမယ့် စိန်ခေါ်မှုကတော့ သူဟာ လူ့အခွင့်အရေးကို ထရမ့်ထက်ပိုဦးစားပေးနိုင်လို့ ဘင်္ဂါလီကိစ္စဟာ ပြဿနာဖြစ်လာနိုင်ပါတယ်။ မြန်မာအနေနဲ့က မိမိလုပ်စရာရှိတာ လုပ်နေတာတွေကို အချိန်မှီရှင်းပြထားသင့်သလို အမေရိကန်က ပိတ်ဆို့လာရင်တရုတ်နိုင်ငံနဲ့ ရုရှားနိုင်ငံတို့နဲ့ နီးသွားနိုင်ကြောင်းလဲ အမေရိကန်နားလည်အောင် ပြောထားသင့်ပါတယ်။
နောက်ဆုံးမှာတော့ နိုင်ငံကြီးတွေဟာ မိမိတို့အကျိုးစီးပွါးအတွက်သာ စဉ်းစားတာပါ။ အမေရိကန်အနေနဲ့ ဘင်္ဂါလီကိစ္စအပေါ် မတရားဖိအားပေးပြီး မြန်မာကို တရုတ်နိုင်ငံနား တွန်းပို့မလား? ဒါမှမဟုတ် မြန်မာက ဖြေရှင်းဆောင်ရွက်နေတာတွေကို ဝိုင်းဝန်းကူညီဖြေရှင်းပြီး နှစ်နိုင်ငံဆက်ဆံရေးတိုးတက်အောင်လုပ်မလား ရွေးရမှာပါ။
သေချာတာက ဂျိုးဘိုင်ဒန် သမ္မတဖြစ်တာဟာ မြန်မာပြည်အတွက် ကံကောင်းခြင်းလို့ သေချာမပြောနိုင်ပေမယ့် Senator Mitch McConnell ပြန်အရွေးခံရတာကတော့ ကံကောင်းခြင်းလို့ ပြောလို့ရပါတယ်လို့ ပြောပါရစေ။