လေထဲမှ အထိုးခံရသည့်အခါ

ဖက်ဆစ်မအလဟာ NUG အစိုးရကို လေထဲကအစိုးရ လိုင်းပေါ်ကအစိုးရလို့ လှောင်လေ့ရှိပါတယ်။ ဒါပေမယ့် မအလဟာ လိုင်းပေါ်ကအစိုးရလုပ်တာကို နောက်ကလိုက်လုပ်နေရပါတယ်။ သူ့ရဲ့ ဝန်ကြီးချုပ်ရာထူးတောင် NUG က ခြေဥဖျက်ပြီး ထွင်လုပ်တာကို လိုက်တုလုပ်နေရတာပါ။

တပ်ရဲ့လုံခြုံရေးသတင်းမှာ နေပြည်တော်၊ ဧရာဝတီ၊ ပဲခူးနဲ့ မွန်ကို သူတို့အပိုင် ထိန်းချုပ်ထားတဲ့ အစိမ်းရောင်နယ်မြေအဖြစ် သတ်မှတ်ထားပြီး ရန်ကုန်နဲ့ မန္တလေးက ၅၀-၅၀ လို့သတ်မှတ်ထားပါတယ်။ စစ်ကိုင်း၊ မကွေး၊ ချင်း၊ ကယားနဲ့ တနင်္သာရီက ရန်သူအားကောင်းနယ်မြေလို့ သတ်မှတ်ထားပါတယ်။ ရခိုင်၊ ကချင်၊ ရှမ်းမြောက်နဲ့ ကရင်က ရန်သူ့နယ်မြေဖြစ်ပြီး စစ်ဖြစ်ရင် ဆုတ်ခွါရနိုင်တယ်လို့ သတ်မှတ်ထားပါတယ်။ စစ်ဆင်ရေးလုပ်လိုရင်သာလွန်အင်အား သုံးရမှာဖြစ်လို့ လက်ရှိမှာ တစ်ပြိုင်နက်ထဲတိုက်ရန် ထိုးစစ်ဆင်ရန် မဖြစ်နိုင်လို့ သုံးသပ်ထားပါတယ်။ ရှမ်းတောင်နဲ့ အခြားဒေသတွေဟာ ရန်သူအချင်းချင်းတိုက်နေလို့ သူတို့ကိုဒုက္ခမပေးနိုင်လို့ သုံးသပ်ထားပါတယ်။ အဆိုပါ ရခိုင်၊ကချင်၊ ရှမ်းမြောက်နဲ့ကရင်ကသာ လက်နက်ကြီးရလို့ ယခုအချိန် ထတိုက်ရင် မအလရှုံးပါမယ်။

NUG က ထီစရောင်းချိန်မှာ မအလရဲ့ ကျပ်မပြည့်တဲ့အဖွဲ့ ထင်ထားတာက ပြည်ပမှာသာရောင်းမယ်လို့သာ ထင်ထားခဲ့တာပါ။ ပြည်တွင်းမှာတော့ ချဲဒိုင်လိုသာ လုပ်မယ်လို့ ထင်ခဲ့ပုံပါ။ စာရေးသူတို့တောင် ဝင်ငွေကို ထီကနေရှာရမှန်း မသိခဲ့ပါ။ စီးပွါးရေးသမားတွေထံကအခွန်ကောက်တာလောက်သာ တွေးခဲ့တာပါ။ ဒီနေရာမှာလဲ NUG က မထင်မှတ်တဲ့နေရာကနေ ထပြီးထီရောင်း ပြည်တွင်းက ငွေးပေးစနစ်ကို ကွန်ပျူတာကတဆင့်သုံးပြီး ရောင်းသွားသလို ပြည်သူကလဲ ဝက်ဝက်ကွဲအားပေးလိုက်လို့ မအလမြွေဖမ်းသွားပါတယ်။ ပြည်ထဲရေးနဲ့ဘဏ္ဍာအခွန်တစ်ညလုံး အစည်းအဝေးထိုင်ပြီး ဘဏ်တွေပိတ်ဖို့အထိ စဉ်းစားလာပါတယ်။ဒါပေမယ့် သူတို့ပိတ်ရင် လိုင်းပေါ်က ငွေသုံးလို့မရရင် သူ့ဘဏ်စနစ်ပြိုကွဲမှာမိုလို့ မအလဟာNUG ရဲ့ ခွချက်လုပ်တာ ခံလိုက်ရပါတယ်။ ဘဏ်ငွေပေးစနစ်ပိတ်ရင်လဲ သူ့စီးပွါးထိခိုက်မယ်မပိတ်ရင်လဲ NUG ထီရောင်းတာကို တားမရဖြစ်မယ်ဆိုတဲ့ အနေအထား အကျပ်အတည်းထဲရောက်သွားခဲ့ပါတယ်။

NUG ဟာ လုပ်ငန်းအတော်များများကို လိုင်းပေါ်က အောင်မြင်စွာလုပ်လာနေပါတယ်။ မအလဟာ ယခင်ကလိုမဟုတ်ဘဲ NUG ကို နောက်ကနေလိုက်တုန့်ပြန်နေရပါတယ်။

တပ်ထဲမှာလဲ PDF တပ်အတွက် ကင်းစောင့် ကျင်းတူး၊ မိုင်းမြုပ်နဲ့ အလုပ်ရှုတ်နေတာ လချီနေပြီး ဆရာဇော်ဝေစိုးပြောလိုက် ရေးလိုက်တိုင်း တပ်လှန့်နေရလို့ နောက်ပိုင်း တကယ်လာတိုက်ရင်တောင် တပ်ကအသင့်အနေအထားရှိဖို့ ခက်လာမှာပါ။

စာရေးသူမြင်တာကတော့ ယခုအချိန်ထိ NUG ရဲ့ PDF တပ်ကမလာသေးဘဲတောင် မအလဟာ လေထဲက အတိုက်ခံ အထိုးခံနေရတာနဲ့တင် အတော်နာနေပါပြီ။ တကယ်သာလက်နက်ကောင်းကောင်းနဲ့ PDF က တိုက်နိုင်ရင် ရန်ကုန်ဟာ အချိန်မရွေး ဒီမိုလက်ထဲရောက်မှာပါလို့ ပြောပါရစေ။