ဖြစ်မိသည့် ပီတိ

မနေ့က မြန်မာ့မီးရထားက ဒုမန်နေဂျာတစ်ယောက်တင်ထားတဲ့ သံလမ်းအသစ်ဗီဒီယိုဖိုင်ကို ကြည့်လိုက်ရပါတယ်။

ရိုက်သူကိုယ်တိုင်လဲ သူ့တစ်သက်မှာ မမြင်ဖူးတာတွေဖြစ်ကြောင်း ပြောသွားပါတယ်။ သူက ရထားလမ်းအသစ်တွေနဲ့ ပြည်သူတွေအတွက် ကြိုပျော်နေပုံပါ။ စာရေးသူလဲ သူ့အပျော်လေးတွေ ကူးစက်ပါတယ်။

အရာရာတိုင်းဟာ သူ့အလိုလို ဖြစ်လာတာတော့မဟုတ်ပါ။ စာရေးသူတို့ ၂၀၁၅ မှာ NLD အစိုးရကို မဲပေးခဲ့လို့ သံလမ်းတချို့ကို စပြင်နိုင်ခဲ့တာပါ။

အချို့က ယခုလို ရထားလမ်း၊ ကားလမ်းပြင်တဲ့ပုံတင်ရင် ယခင်အစိုးရက စီမံချက်စွဲခဲ့လို့ မင်းတို့ဆောက်နိုင်တာ ဘာညာဆိုပြီး ပြောလေ့ရှိပါတယ်။ ယခင်အစိုးရဟာ ၁၉၈၈ ထဲကနေ ၂၀၁၅ အထိဘယ်လိုသံလမ်းမျိုး ဆောက်ခဲ့လဲ အားလုံးသိမှာပါ။ ထို့အတူပါဘဲ ဂြိုလ်တုဟာလဲ လေစီမံချက်မှာသာရှိခဲ့ပြီး အဆိုပါစီမံကိန်းအတွက် ပိုက်ဆံတွေဟာ ဘစိန်လက်ထက် အောက်ခြေမှာ ပျောက်သွားခဲ့ပါတယ်။ ဂြိုလ်တုဟာလဲ NLD အစိုးရလက်ထက်မှသာ တင်နိုင်ခဲ့တာပါ။

ဘာကွာလဲဆိုတော့ ရိုးသားမှု၊ စေတနာ၊ မေတ္တာနဲ့ စီမံခန့်ခွဲမှုပါ။ ရိုးသားမှုမရှိသူများဟာ ခိုးဖို့သာကြည့်ခဲ့ပြီး ပြည်သူအပေါ် စေတနာနည်းခဲ့လို့ ၂၀၁၅ အထိ ဆင်းရဲခဲ့ရတာပါ။ စီမံခန့်ခွဲမှုပါ ညံ့တော့တိုင်းပြည်ဟာ နလံမထူနိုင်ခဲ့ပါ။

ယခုလေးနှစ်ကျော် NLD အစိုးရလက်ထက်မှာ ဘက်စုံပြုပြင်ဖို့ ကြိုးစားနေတာကို ရထားလမ်းဗီဒီယိုက ဥပမာတစ်ခုအနေနဲ့ သက်သေပြနေပါတယ်။ သူ့ကိုယ်စား ပီတိလဲ ဖြစ်မိပါတယ်။

Video credit: Bayint Naung