တပ်နှင့်ခရိုနီများအကြား တုန်လှုပ်လာသော ပေါက်ကွဲမှု
မြေပြင်မှာဖြစ်နေတာတွေက အလွန်မြန်နေပါတယ်။ လွန်ခဲ့တဲ့ နှစ်ရက်လောက်က မအလကအစည်းအဝေးမှာ ရန်ကုန်ဟာ ကိုဖြိုးဇေယျာသော်ကို ဖမ်းအပြီးမှာတည်ငြိမ်လာပြီဖြစ်ကြောင်း အစိုးရအဖွဲ့အစည်းအဝေးမှာ ထည့်ပြောသွားခဲ့ပါတယ်။ ဒီကိစ္စလောက်ကို ထည့်ပြောတာကိုက ထူးဆန်းနေပါတယ်။ သူပြောအပြီးမှာ ရန်ကုန်မှာ ပေါက်ကွဲမှုတွေက ခပ်စိတ်စိတ်ပြန်ဖြစ်လာခဲ့ပါတယ်။ ဒါကသူ့ပါးကို PDF က ဖြတ်ရိုက်လိုက်တာပါ။
ဒီထက်စိုးတာက လေတပ်က အရာရှိတွေရဲ့လိပ်စာ ပေါက်ကြားတာပါ။ ဒါဟာ စစ်ရာဇဝတ်မှုကျူးလွန်နေတဲ့ စစ်အရာရှိတွေအတွက် လေတပ်ပြီးရင် ငါတို့တပ်လဲ ပါလာနိုင်တယ်ဆိုတာကို သတိပေးသလိုဖြစ်သွားခဲ့ပါတယ်။ အထဲက ဖရဲသီးကိုရှာဖို့ အမိန့်စာတွေ အဆင့်ဆင့်နေ့ချင်းထွက်လာခဲ့ပါတယ်။ အချို့ကလဲ မိမိပိုင်အိမ်အတွက်စိတ်ပူ၊ ထိုအိမ်မှာနေသူအတွက်စိတ်ပူနဲ့ အလုပ်များသွားခဲ့ပါတယ်။ အချို့ကလဲ ရောင်းဖို့ ပွဲစားထံအပ်ပေါ့။ လေတပ်နဲ့ကြည်းတပ်က ရက်စက်ယုတ်မာစွာ ဗုံးကြဲ၊ ရွာမီးရှို့နေလို့ ပြည်သူ့ဒေါသကလဲ အထွဋ်အထိပ်ရောက်လာနေပါတယ်။ ယခုအချိန် စစ်တပ်ထဲမှာတောင် ကင်းစောင့်နေရလို့ သူတို့အိမ်တွေရဲ့လုံခြုံရေးကို မအလတပ်က စစ်ကိုင်း၊ ကချင်၊ ကရင်၊ မကွေး၊ ရခိုင်၊ ချင်း၊ ကရင်နဲ့ ကယားမှာမပေးနိုင်မှန်း သူတို့သိကြပါတယ်။ ဒါပေမယ့် ရန်ကုန်ကတော့ မြို့ကြီးလဲဖြစ် မအလကလဲလုံခြုံပြီလို့ ရက်ပိုင်းအတွင်းက ကြေငြာထားလို့ ဘယ်သူမှ မမျှော်လင့်ထားခဲ့ပါ။ လှိူင်မြို့နယ်က ဗိုလ်မှူးဇေယျာမြင့်သိန်းအိမ်လို့ ခေတ်သစ်က တင်ချိန်မှာ ထိုအိမ်ဟုတ်မဟုတ် ဖုန်းတွေဆက်မေးကြပါတယ်။ နောက်ဆုံးသူ့အိမ်အမှန်ဖြစ်နေချိန်မှာ အားလုံးက သွေးပျက်သွားကြပါတယ်။ ဘာလို့လဲဆိုတော့ လက်ရှိဗိုလ်မှူးကြီးတွေ၊ ဗိုလ်မှူးချုပ်တွေ၊ ဗိုလ်ချုပ်တွေအိမ်တွေကရန်ကုန်မှာ အများကြီး မိုလို့ပါ။ ရန်ကုန်တောင် လုံခြုံရေးမပေးနိုင်ရင် အာဏာမသိမ်းနဲ့ ထွက်ဆိုပြီးလဲ စဆဲလာနေပါပြီ။ ဖြစ်မယ်လို့ စာရေးသူတို့ထင်ပေမယ့် ယခုဖြစ်သွားတဲ့နှုန်းကအရမ်းကို မြန်သွားပြီး တပ်ထဲကအရာရှိပိုင်းတွေကို မှင်သက်သွေးပျက်သွားစေတာပါ။
ထို့အတူပါဘဲ ဆီဆိုင်ပိုင်ရှင်တွေ၊ ဘဏ်တွေဟာလဲ မအလနဲ့ ပူးပေါင်းလို့ ပြည်သူက အမြင်မကြည်တာ သူတို့လဲသိပါတယ်။ ဒါ့ကြောင့် ဘဏ်တွေကို လုံခြုံရေး တိုးချထားခဲ့ပါတယ်။ KBZ က Kpay ကြောင့် လူမုန်းများသလို UAB ကလဲ အောင်သောင်းသားပိုင်တာရယ် လက်ရှိကာကွယ်ရေးဦးစီးချုပ်(ရေ) ဗိုလ်ချုပ်ကြီးမိုးအောင် ရှယ်ယာပါတာရယ်ကြောင့် နာမည်ထွက်လာတာပါ။ UAB က အစောင့်တွေဆို စစ်သားလူထွက်အများစုပါ။ ဒါပေမယ့်အများစုက ထင်ထားခဲ့တာက ဒီကောင်တွေမလုပ်ရဲပါဘူး လေပါလို့သာ ထင်ခဲ့တာပါ။ ဒါပေမယ့် မနေ့ကမီးလောင်သွားအပြီးမှာ KBZ က မအလကို လုံခြုံရေးထပ်တိုးတောင်းထားပါတယ်။ မအလအဖွဲ့ကလဲ Mytel လို လုံခြုံရေးတိုးမြှင့်ဖို့သာ အကြောင်းပြန်ထားပါတယ်။ ရေရှည်မှာ ယခုလိုခြိမ်းခြောက်ခံရပြီး စီးပွါးရေးလုပ်မရဘူးဆိုတာ KBZ ရော၊ UAB ရော သိပါတယ်။
အကျဉ်းချုပ်ရရင် မြေပြင်မှာဖြစ်နေတာတွေက စာရေးသူတို့ လိုက်မမှီလောက်အောင် မြန်နေပါတယ်။ အချို့တွေက မအလအရှက်ကို ကွဲစေပြီး အချို့ကိစ္စတွေက တပ်တွင်းမှာ ဖိအားတွေ ဖြစ်လာစေပါတယ်။ အချို့ကိစ္စတွေကတော့ ခရိုနီတွေကို ယခင်ကလို အဘနဲ့ပေါင်းရုံနဲ့ မရတော့ကြောင်း သတိပေးသလို ဖြစ်စေပါတယ်။ နောက်ဆုံးကတော့ ပြည်သူသာအဓိကပါ။တော်လှန်ရေးကြီးက အသံထက်မြန်နေတာ တွေ့ရပါတယ်။