တပ်ချုပ်အသစ်ကဘာတွေပြင်သင့်လဲ

မြန်မာပြည်ရဲ့လက်ရှိပြဿနာဟာ ၂၀၀၈ ခြေဥနဲ့ လက်ရှိတပ်ချုပ်ရဲ့ နိုင်ငံရေးရည်ရွယ်ချက်ကြောင့်ဖြစ်လာခဲ့တာပါ။ ဒီနေရာမှာ ဒီမိုသမားများကလဲ၂၀၀၈ ခြေဥကို ပြင်စေချင်ပြီး ဖယ်ဒရယ်စနစ်ကို သွားလိုမှာပါ။ ဒါကသာတစ်ခုထဲသော ထွက်ပေါက်ပါ။ ဒါပေမယ့် မြေပြင်က အနေအထားဟာဘယ်လောက်အထိ အခြေအနေပေးမလဲဆိုတာက မေးခွန်းထုတ်စရာပါ။

တပ်အနေနဲ့ တပ်ချုပ်အသစ်အနေနဲ့ အနည်းဆုံးဘာတွေ ပြင်သင့်သလဲ? ပထမဆုံးက ရွေးကောက်ပွဲမှာNLD ဟာ အပြတ်နိုင်ခဲ့ပါပြီ။ ဒါကို ဖွတ်လုပ်သလို ညစ်တွန်းမတွန်းဘဲ အသိအမှတ်ပြုရပါမယ်။ တပ်ချုပ်သစ်ဟာ နိုင်ငံရေးအရ ရည်မှန်းချက်မရှိဘဲ မိမိအလုပ်သာ မိမိလုပ်သူဆိုရင် ပြည်သူတင်တဲ့အစိုးရနဲ့ ဆက်ဆံရေး ပိုအဆင်ပြေလာနိုင်ပါတယ်။ မိမိသမ္မတကို တလေးတစား နေ့တိုင်းဆွေးနွေးတင်ပြတာ အတိုင်ပင်ခံဦးစီးတဲ့ လုံခြုံရေးဆိုင်ရာအစည်းအဝေးကို မိမိကိုယ်တိုင် တက်ရောက်ပြီး မိမိလိုအပ်ချက်တွေကို တွေ့ဆုံဆွေးနွေးတင်ပြသင့်ပါတယ်။

နောက်အရေးကြီးတာက လွှတ်တော်ထဲမှာ မိမိတပ်ကိုယ်စားလှယ်တွေကို ပါးစပ်ပိတ်ထားခိုင်းဖို့ပါ။ သူတို့က အော်ကြီးဟစ်ကျယ်ပြောလေ ပြည်သူကတပ်ကိုမုန်းလေပါ။ နောက်တပ်ထဲမှာ ဗိုလ်လောင်းသင်တန်းတွေ စစ်ဦးစီးတက္ကသိုလ်တွေမှာ ဒီမိုသဘော၊ လူ့အခွင့်အရေးသဘော၊ အရပ်သားအစိုးရကိုလေးစားတဲ့သဘောတွေ ယခုထက်ပိုသင်ဖို့ ပြင်ဆင်သင့်ပါတယ်။

ဒါ့အပြင် တပ်ကလုပ်ထားတဲ့ စီးပွါးရေးတွေကို လျှော့ချဖို့လဲ ပြင်ဆင်သင့်ပါတယ်။ မပြင်ရင်လဲ နိုင်ငံခြားက စီးပွါးရေးပိတ်ဆို့တာက လာမှာပါဘဲ။ ဒါ့ကြောင့် မိမိဖာသာပြင်ပြီး အစိုးရထံက ဘတ်ဂျက်တောင်းတာသာ အကောင်းဆုံးပါ။ ရေရှည်မှာ ပြုပြင်ပြောင်းလဲမှုတွေဟာ မဖြစ်မနေလုပ်ဆောင်ရမှာပါ။စစ်သားတွေကို မိမိအလုပ်သာလုပ်ခိုင်းသင့်ပြီး ကြက်မွေးသလို၊ ဝက်မွေးသလို၊ စပါးစိုက်သလိုလုပ်နေရရင် နောက်ပိုင်းမှာ တပ်ထဲကိုဝင်သူရဲဘော်တွေ နည်းလာပါလိမ့်မယ်။ နောက်တပ်ထဲမှာ တပ်ဖွဲ့ဝင်တွေရဲ့ မိန်းမတွေက အထက်လူကြီးမိန်းမများရဲ့ ကျွန်သဖွယ် ဆက်ဆံခံနေရတာကိုလဲ ပြင်ဆင်သင့်ပါတယ်။ ယခုအချိန်မှာက ၂၁ ရာစုပါ။ သီပေါမင်းခေတ်မဟုတ်တော့ပါလို့ ပြောပါရစေ။

တပ်အတွက်မေးခွန်းက မိမိဖာသာ ပြုပြင်ပြောင်းလဲမလား ပြုပြင်ပြောင်းလဲရေးကို တင်းခံပြီးတိုင်းပြည်တိုးတက်မှုကို နောက်ပြန်ဆွဲထားတဲ့ တရားခံအဖြစ်ခံမလား ရွေးရမှာပါ။ တပ်ချုပ်အသစ်အနေနဲ့ နိုင်ငံရေးမှာ ဘာနိုင်ငံရေးမှ ဝင်မပါဘဲ ပြည်သူကရွေးကောက်သူသည် အာဏာအရှိဆုံးသူ civilian supreme ဆိုတာကို တပ်ထဲမှာ လက်ခံနိုင်အောင်လုပ်နိုင်ရင် တိုင်းပြည်လဲ တိုးတက်လာနိုင်ပါတယ်။

မဟုတ်ရင်တော့ ပြည်သူတွေရဲ့ စစ်ကိုမုန်း၍ မဲပေးပြီး တိုက်ထုတ်တာကို ခံနေရမှာပါ။