တပ်ချုပ်သမ္မတဖြစ်နိုင်လား?
တပ်ချုပ်သမ္မတဖြစ်ဖို့ဆိုရင် အာဏာမသိမ်းဘဲ ဖြစ်ဖို့ကတော့ ရွေးကောက်ပွဲနည်းလမ်းသာ ရှိပါတယ်။ဒါကြောင့် တပ်ချုပ်သမ္မတဖြစ်နိုင်လားလို့မေးရင် တပ်ချုပ်နဲ့ နီးစပ်တဲ့ပါတီတွေက ရွေးကောက်ပွဲမှာအနိုင်ရနိုင်လားဆိုတဲ့အပေါ်မူတည်ပါတယ်။
ယခုအချိန်ဟာ ၂၀၁၇သူ့ရဲ့ခေတ်ကောင်းချိန်ကျော်သွားပြီမို့ အာဏာသိမ်းဖို့က မဖြစ်နိုင်တော့ပါ။ ဒါကြောင့် တပ်ချုပ်ရဲ့ မျှော်လင့်ချက်ဟာ ရွေးကောက်ပွဲအပေါ်မှာသာ မူတည်နေပါတယ်။ တပ်နဲ့ ဖွတ်ပါတီ မျှော်လင့်ထားတာက NLD နဲ့ SNLD က လွဲရင် အခြားပါတီတွေ ၂၅% အထက်နိုင်မလားဆိုတာပါ။ သူတို့တွက်ထားတာက အဆိုပါ နှစ်ပါတီကလွဲရင် ကျန်ပါတီတွေကို စည်းရုံးနိုင်မယ်လို့ တွက်ထားပါတယ်။ ANP ပါတီကလဲ အန်တီကြူက ဖုန်းဆက်လိုက်ရင် ပြေလည်ပါတယ်။ တပ်ချုပ်အနေနဲ့ ယခု၂၀၂၀ ရွေးကောက်ပွဲမှာ ဝင်ရောက်အရွေးခံဖို့မရှိပါ။ ဒါက သေချာပါတယ်။ ယခု အရပ်သားအဖြစ်အငြိမ်းစားယူအရွေးခံမယ့်အထဲမှာ သူမပါပါ။ သူ့ကို သူ့အနားက အရာရှိကြီးတွေက ပြည်သူတွေကတခဲနက်ထောက်ခံကြတယ်လို့ သတင်းပို့ပေမယ့် သူက ကွီးဖြိုးနဲ့ ယှဉ်ပြီး လိုင်းပေါ်မှာမဲခွဲတာ သူ့တပည့်တွေ မဲလိမ်ဖို့ကြိုးစားတဲ့ကြားထဲက ရှုံးခဲ့သူပါ။ သူမအပါဘူး။ သူ့ရည်မှန်းချက်က တကယ်လို့များကြံ့ဖွတ်နဲ့အဖွဲ့က ၂၆% နိုင်ခဲ့ရင်သာ တပ်ဘက်ကနေ ဒုသမ္မတလောင်းဝင်ပါပြီး သမ္မတဖြစ်လိုတာပါ။
ဒါဆိုပြည်မက အခြေအနေကို ကြည့်ရအောင်။ လက်ရှိအစိုးရ မကောင်းဘူးလို့ထင်အောင် စာနယ်ဇင်းတွေ၊ အကောင့်တုတွေအတွက် ပိုက်ဆံများစွာသုံးထားခဲ့ပါတယ်။ ဒါပေမယ့် သူက DASSK ဒုက္ခရောက်အောင်လုပ်ခဲ့တဲ့ ICJ နဲ့ ကိုဗစ်ကြောင့် ပြည်သူတွေရဲ့ DASSK ဦးဆောင်တဲ့ NLD ပါတီကိုထောက်ခံမှုဟာ ထပ်မတိုးလာရင်တောင် ကျမသွားခဲ့ပါ။ ရွေးကောက်ပွဲမှာ ယခင်က NLD ကို မဲပေးပြီးယခု မဲမပေးသူရှိနိုင်ပါတယ်။ ထို့အတူပါဘဲ ယခင်ကကြောက်လို့ ဖွတ်ကိုမဲပေးခဲ့ရသူများဟာလဲ ယခုအချိန်မှာ NLD ဘက်ပြောင်းသွားမှာဖြစ်ပါတယ်။ အထူးသဖြင့် တပ်မဲရုံတွေမှာပါ။ ဒါကြောင့် ပြည်မမှာ မဲဆန္ဒနယ်တစ်ခုကို ယခင်က ၇၅% နိုင်ခဲ့ရင် ယခုလဲ ၇၀% လောက်နဲ့ ဆက်နိုင်ပါမယ်။ ဘာလို့လဲဆိုတော့ NLD ကထွက်သွားတဲ့ ၁၀% နဲ့ NLD ဘက်ပြောင်းလာတဲ့ ၅% က ပြန်ချေသွားလို့ပါ။
NLD က ယခင်က ရှုံးခဲ့တဲ့ မောင်မြင့်နေရာ၊ သောင်းအေးနေရာတို့ကို နိုင်အောင်လုပ်လာမှာဖြစ်သလို စိုးသိန်းနေရာဟာလဲ NLD နိုင်လာပါမယ်။
ချင်းနဲ့ကယားမှာလဲ အသစ်မဲဆန္ဒနယ် မနိုင်ရင်တောင် ယခင်ကလောက်အနည်းဆုံး ဆက်နိုင်ပါမယ်။ရှမ်းပြည်နယ်မှာ NLD နဲ့ SNLD အပေးအယူမျှရင် ဖွတ်တွေယခင်ကလောက်မနိုင်အောင် လုပ်လာနိုင်ပါမယ်။ ဥပမာ ဦးကိုနီသတ်ရာမှာ ပါဝင်တယ်လို့ ပြည်သူတွေက စွပ်စွဲခံရတဲ့ တပ်ချုပ်ရဲ့ ကိုယ်ရေးအရာရှိဟောင်းမိုင်းဖြတ်အမတ် လင်းဇော်ထွန်းနေရာမျိုးကို NLD က မိမိ မနိုင်နိုင်ရင် SNLD နဲ့ တိုင်ပင်ပြီးလုပ်နိုင်ရင် ဖွတ်တွေ လွှတ်တော်ထဲမှာ နည်းသွားပါမယ်။
ရခိုင်မြောက်မှာတော့ NLD မနိုင်နိုင်ပါ။ ရခိုင်တောင်ပိုင်းမှာလဲ ယခင်ကလောက်နိုင်ဖို့ မဖြစ်နိုင်ပါ။ ဒါပေမယ့် ရခိုင်မှာ ဆုံးရှုံးမှုဟာ ဗဟိုအစိုးရဖွဲ့တာကိုတော့ မထိခိုက်နိုင်ပါ။ ကချင်နဲ့ မွန်မှာ အချို့နေရာအပြောင်းအလဲရှိနိုင်ပေမယ့် ပြည်မက ဖွတ်နေရာတွေကို NLD က နိုင်ပြီး ပြန်ကာသွားနိုင်ပါမယ်။
ဒီနေရာမှာ NLD ကို မဲမပေးချင်တဲ့သူရှိလားဆိုတော့ ရှိနိုင်ပါတယ်။ သူတို့ထဲက အချို့ဟာ ဖွတ်၊ အချို့က ဘရွှေမန်းပါတီ၊ အချို့က ကိုကိုကြီးပါတီ၊ အချို့က ဒေါက်ခိုင်ပါတီတွေကို ပေးကြမှာပါ။ ဒါကြောင့်မိုလို့ သူတို့မဲကလဲ ကွဲမှာပါ။
အကျဉ်းချုပ်ပြောရရင် ပြည်သူတွေအနေနဲ့ အလုံးအရင်းနဲ့သာ မဲထွက်ပေးရင် တပ်ချုပ်မအလဟာသမ္မတလုံးဝမဖြစ်လာနိုင်ပါ။ သူသမ္မတဖြစ်အောင် သူနဲ့နီးစပ်တဲ့ပါတီတွေကို မဲပေးဖို့ ဘုန်းကြီးအချို့က မဲဆွယ်နိုင်ပေမယ့် ပြည်သူတွေက သူတို့အနာဂတ်အတွက် အကောင်းဆုံးကို မဲပေးကြမှာပါ။
ဘယ်အရာမဆို ဘယ်တော့မှ မဖြစ်လာနိုင်ဘူးလို့ မပြောပါနဲ့ “Never say Never” ဆိုတဲ့ စကားပုံကလဲ ရှိနေပါတယ်။ ဒါကြောင့် တပ်ချုပ်သမ္မတဖြစ်ဖို့ဟာ ၁% လောက်သာရှိပေမယ့် ပြည်သူလူထုကြီးအနေနဲ့တရားမျှတမှုကို ဖော်ဆောင်သူကိုသာ မဲပေးခြင်းဖြင့် မတရားလုပ်သူ မတက်အောင် အသဲကြားက မဲတစ်ပြားကို သုံးကြပါလို့ ပြောပါရစေ။